文/徐红生
细毛里只崽俚，到镇上捡破烂，捡得一只古怪个碗。舞得许多好戏得个事出来。
友情提示：看不大懂个位境，用屋里人说个话读，肯定就可看得懂。
细毛屋里离镇上谬几远，尽管其今年已经满得一十三，屋里个爷娘看得细佬重，总不叫其做么得事，碰到学里不上课，细毛不喜欢在屋场上戏得，喜欢到镇上去捡东西卖钱，买么得吃。到得礼拜六，屋场上的崽俚差不多都到得镇上，捡得到就捡，捡不到就偷。细毛到镇上，有时得是跟屋场上大大细细个男崽俚女崽俚，大帮小伙得同去，有个时得只是其一个人。
里日得学里放得假，细毛早晨吃得粥一下都冒等，就出门去邀别家同到镇上去，大爷屋里细爷屋里，隔壁爹得前头嘎嘎屋里都去得，谬人，走得半边屋场，一样大个崽俚人毛得都冒看到一只，其就只好一个人走。
出得门还冒走几脚路，就看到寡嘴老倌在前头也是一个人。寡嘴比细毛小两岁，在崽俚里头说起话来总是鬼话三天，管么得事都三十三天说，里也晓得嗯也晓得，死喜欢摆脸，吃一点点亏得又不敢扯横纹，就晓死一把皮来，湿皮臭缠。寡嘴，拖吧，射子几只鬼东西在屋场上总是做慫人得，摆螯硬，不过其几个都有些得怕细毛。细毛人好性不好，喜欢发鼓，在屋场上大号鼓屎子，撩得细毛发火个人，一般都谬好果子吃。
寡嘴在前头卵摆卵摆，细毛在后头趱劲走，谬一下下得细毛就赶上得寡嘴。细毛打算今朝跟寡嘴打伙得捡东西。细毛喜欢两个人在一块捡东西。人多得，分起钱来分不到两角，一个人捡东西又谬么味道，不好戏得。
“寡嘴，看到其一帮人么？”细毛问。
“呃，细毛，嗯郎格里个晏再来哩，其一帮人只怕粥都冒吃就到镇上去得，一只都冒看到，表得到哪里去得。”寡嘴说。
看到细毛来得，寡嘴心里蜜钵得，晓得细毛肯定要寻人打伙得。细毛力又大，眼钟又尖，手脚又快，捡起东西来最在行，随便哪个，只要是跟细毛打伙得，嫑么做事分个块把两块钱是拿稳得。
“寡嘴，俺两个人今朝打伙得不？”细毛说。细毛对一块打伙得个人要求不是太高。
也表得是哪里学来个，寡嘴不管做么事都想占别人个赢门得。寡嘴晓得，跟细毛打伙得捡东西好处是大，可是细毛跟打伙得个人分钱不是二一添作五，而是东西哪个捡得哪个就得大头得，冒捡个人就得细头得。寡嘴想，今朝细毛寻不到别人打伙得，只能寻其，还有就是细毛捡东西喜欢跟人打伙得，不喜欢一个人。所以，寡嘴就装俏俏得，想在答应打伙得之前跟细毛讲正，卖个钱要两个人对半分。就说：“今朝哇，今朝不么愿意捡得东西，捡东西今朝可能晏得，其一帮人几晨去得个，等俺两个去，好难捡到。我最看不惯有个人捡得两块钱就显大得，显得抱鸡婆扬旗得，显得不晓得辫巴得在哪里。我是到镇上买滂头得，等下得到堰里去钓鱼。”
“嗯怕去得早个就可捡得到呗？上昼俺两个捡东西，下昼俺两个去钓鱼。嗨，滂头得还要买，我拿大蒜胱得跟你做一下。”细毛老实，完全不晓得寡嘴个心思得。
“大蒜胱得做个滂头得不好，买个滂头得好看，鱼吃没吃钩一看就晓得。上一回，一只蛮大个鲩鱼咬得我个钩，就是用了大蒜胱得做处滂头得，过得好多时才看到，拉起来晏得，鱼跑得，有好几斤重嘞。”寡嘴说了一大堆理由。
“买滂头得就买滂头得，等下得捡东西个时得反正也到到社上去，俺两个人打伙得，就算说好得。”细毛说。
里是寡嘴冒想到个，寡嘴还是不能里样个答应细毛，又说：“下昼钓鱼谬上昼钓鱼好，下昼钓不到鱼，上昼钓鱼好。”
寡嘴肚里一心想郎格让细毛求其打伙得，好得能提出让细毛答应对半分钱个事，一下都冒警觉前头路上有一只水潭，也冒警觉后头来得一部车。嗯只开车个司机也是只短命鬼得，看到路上有水潭路侧边有人，径把车开快，车砣舞起来个水跟泥巴，灒得寡嘴一身，短裤得绷得都是洇湿个，泥巴搭壁，还有好多个屑衣得也沾在上头，寡嘴然个成得一只乌屎子。
“嗯屋里倒绝，嗯屋里死爷，开车几九几，娘膣眼东西。开车，开嗯屋里人，开嗯个祖宗三代，开嗯到背口岭上去，倒绝个东西，死爷个河佬，下次撞到你只老子，不栽破嗯只玻璃，你只老子就不是人。嗯前世造得恶，里世谬好报，另世也谬好报，另另世都还是倒绝。……”细毛望着车屁股骂。想到能跟细毛打一番伙得个机会就里样个谬得，寡嘴肚里又是起火，又是濞曹个。
“哈哈哈哈，寡嘴，还买滂头得啵，买鬼哟，赶快到屋里换绷的换裤喔。”细毛丢下寡嘴，一个人往镇上走。
按照大人的个说法，里一日的细毛个日子有些得不干净。
细毛到得镇上，就去寻东西捡。东寻西寻走到一只位境，看到前头有硬壳纸，正要去捡，就听到打爆竹，难怪是嗯得死得人。细毛听到有人说：“嗯去打课书早些得来，大爹得等到日子，好安派人到亲戚屋里把信。”细毛怕死人，有再多个东西也不想捡，跑得。
又走到一只位境，细毛听到有两只女卵得挭经降祸，降得雾气昂天。一只女卵得说：“嗯只不要脸个东西！白面！洋面粉！青皮梨得！秋白茄得！不晓得丑卖几多钱一斤，四到里困人，七屋八社个男卵得都等你困净得。里样个，你还不如在三叉路口搭茅棚得，又赚钱又止痒。”既只女卵得说：“我是白面，洋面粉，嗯好，嗯螯硬，嗯又好看又中用，看你乖乖样子得，项多也是菩萨胩里个卵，神棍得。我困得七屋八社，嗯九世外国个男卵得都喜欢咧。怕我不晓得吧，做女崽俚个时得就跟男卵得疯疯石石，还冒拜堂就攀筲箕吃冷饭。还跟鸡毛换灯草个人跑过，现世报个东西，说在三叉路口搭棚，我还是跟人，嗯要做，就是去跟外头个狗扯欠啥，五六只，七八只狗都结到嗯侬，有野狗，疯狗，恶狗。”
又走到一只位境，老远八远看到一只做娘个站在堂庼在骂崽，骂得口里馋得哺。化生子，焦苗个，讨债个，舞神扮鬼，扮神扮鬼，朝一丝夕一丝，把我一只好好得个钟，拆成得一抱铁，打八败。骂了一大泻。
转得好几只位境，细毛个么得都冒捡到。细毛上镇捡东西总冒打过塌皮，其有些得不甘心，转啦转，转到镇侧边个野坂里，在一棵苦楝子树兜下坐。坐得谬几多时，其的眼钟就发现跟头的土巴底头有一块瓦片得，像是一块瓦片，又像是一只碗，就是只露得一点点沿出来，赢下来个都埋得土巴底头。
细毛寻到一根棍啪得，在瓦片得侧边雕雕厾厾，瓦片得现得越过越大，等细毛全部雕得出来，还真是一只碗，一只花碗，一点都冒破，合然个。还是细毛总冒看到过个花碗，花布统董。就是嗯只碗看上去不圆，挢膣捩胩个牌子得。细毛听别人说过古董瓷器个事，心里好欢喜，估计自己是挖到得一只宝，肯定能卖好多钱。
推荐文章
热点文章
